Live-Aufnahme: Pedro Lenz über Paul Rechsteiner

 

So, so, sälü zäme,

es isch wieder Wauhkampf

es wird wieder gweiblet,

es wird wieder ufgschtöut,

es wird wieder plakatiert,

es wird wieder versproche.

Si säges enang, si gäbes enang,

es isch wieder Wauh- wieder Wauh-,

wieder Wauh- wieder Wauhkampf.

Wiederwauhkampf isch es.

Es isch chaut worde,

i de letschte Johr,

wenn i umeleuge,

wenn i umelose,

wenn i umeliese,

wenn i umereise

i däm Land,

de ziehts zäntume aus zäme

chli zungerobsi.

 

D Wäut chlopfet aa,

die Wäut dört usse,

die Wäut, wo ke Rueh git,

die Wäut wo nie Rueh git,

wo ke Rueh wott gä,

wo ke Rueh cha gä,

ou jetz im Wauhkampf nid.

 

Aber gäge die Wäut,

gäge die Wäutoffeheit,

gäge d Offeheit vor Wäut,

gits i däm Land Rezäpt,

immer gliichi, auti Rezäpt,

wo nis aus eidgenössisch,

wo nis aus bodeständig,

wo nis aus freiheitlech,

verchouft wärde,

wo aber nume d Freihit

vo de Mehbessere schütze.

 

Mir hei di Rezäpt ghört,

hei se scho so mängisch ghört

und scho lang dürschout:

 

D Stüren abe,

d Türe zue,

d Soziabgagen abe,

d Ouge zue,

Personaubestang abe,

Chinderchrippe zue,

d Ränten abe,

d Gränze zue,

d Gringen abe,

d Härz zue,

aben und zue,

aben und zue,

und de wär Rueh,

und de wär Rueh,

de wär mou Rueh im Land.

 

Das säge nis die,

wo das immer scho,

wo hie immer scho,

wo hie scho so lang,

wo scho vüu z lang,

ds Heft ir Hang

und Gäutigsdrang

hei gha.

 

Vo Rorschach bis a Gänfersee,

tuet jedem ds Stürezale weh,

wott niemer kener Arme gseh,

hockt jeden uf sim Protemonnaie.

 

Aber zwüschinne mou,

chunnt zum Glück e Paul,

chunnt vo nöimen e Paul,

chunnt e Paul Grüeninger

zum Bischpüu,

chunnt e Paul Rächsteiner

zum Bischpüu,

chunnt öppen öpper

wo öppen öppis

versuecht z verändere,

wo mou versuecht,

die Türe chli uf z mache,

di Geischter chli uf z mache,

und denen e Stimm z gä,

und denen e Heimat z gä,

und denen e Chance z gä,

und denen e Hoffnig z gä,

und denen e Zuekunft z gä,

wo ou no do si,

wo ou no do wäre,

wo ou Teil vor Gsöuschaft wäre,

wenn me se würd wöue gseh,

wenn me se würd wöue ghöre.

 

Luegit,

der Paul Grüeninger,

der Flüchtlingshäufer,

het do si Platz,

het do si Platz übercho,

aber es isch lang ggange,

vüu z lang.

 

Der Paul Rächsteiner,

het im Ständerot si Platz,

het im Ständerot si Platz übercho,

aber es isch lang ggange.

 

Es geit äbe mängisch lang,

bis öpper nöimen aachunnt,

bis öpper si Platz überchunnt

öpper, wo sech iisetzt,

öpper, wo die Wäut

i das Land bringt,

öpper wo das Land,

i die Wäut stöut,

öpper wo die vom Rand

i d Mitti ine hout,

öpper, wo die inehout